تعالوا شوفوا (معاناة الزواج) المسكين

معاناة زواج
ــــــــــــــــــــــ
جميله كامله لوصاف بالصدفه ألاقيـــــــها

ونصبت لي شباك الحب ونا قلبي وقع فيها

وعرّسنا وخلّفنا وذي قصتي أحكيـــــــــها

جميله أصبحت أخرى تغيّر كل شي فيـــها

وأصبح فرق واجد بين حاضرها وماضيـها

تبهذلني تنغص عيشتي الله يهديـــــــــــــها

ومن مشوار لامشوار باللازم اودّيــــــــــــها

بغيناها تربّي للآسف صرنا نربّيــــــــــــها

ويامكثر مطالبها ويامكثر مقاضيـــــــــها

ونا بالرغم من ظرفي مطالبها البّيـــــــــها

ولو طلبت لبن عصفور جيبه مقدر أعصيــها

تحب تظهر تحب تفخر وتوهم لي حواليــها

بأن ماحد معه قدره على المظهر يجاريـها

ذهب في صدرها كيلو وكيلو في أياديـها

ونصف الراتب الشهري خياط الثوب لي فيها

ولو ملكت كنوز الارض يمكن ماتكفّيـــــها

بأشياء تافهه تهتم وجم أشياء تخليـــــــها

وتهمل واجبات البيت ماتفضى تسوّيـــــها

وحل الانس تذكر لي مشاكل كنت ناسيها

وتلبس لي ملابس ألف مره شفتهن فــــيها

وفي الاعراس والافراح أحسن لبس لي فيها

وتتزيّن وتتهيّأ وتسرف في تباهيــــــــــــــها

ولو فهّمتها تزعل وبعدين ايش يرضيـــــــــها

تولّع نار وسط البيت حمراء ايش يطفيـــــــها

وبالاوهام والغيره مريضه الله يشفيـــــــــها

ومعها اغنيه في الليل والبكره تغنيـــــــــها

مروّح فين قلّي وين أوقاتك تقضّيــــــــــها

تسوّي اسئله حتى المباحث ما يسويــــــــها

ولوجاوبتها ماصدّقت محتار انا فيــــــــــها

وتتهمني وتحسبني معي اسرار اخفيــــــــها

تنرفزنا وتحرمنا السعاده لي انا فـــــــــيها

انا من هذي الزوجه مشاكل جم اعانيــــــــها

ومن اجل العيال اصبر واتحمل بلاويــــــــــها

نصيحه من شريك العمر يازوجتي سمعيـها

عماره حبنا إنتي ونا مفروض نبنيــــــــــها

وبالاخلاص والحب والوفاء والود نقوّيـــــــها

وبالبسمه وبالحكمه نصلّح أي خلل فيــــــها

وشجره حبنا مفروض بالاخلاص نسقيــــــها

ونرعاها بنيه صادقه وبلطف نجنيـــــــــــــها

ونتمتع في الدنيا ونتناسى مآسيــــــــــــها

نعيش أفراحنا وهمومنا في البحر نرميــها

وساعه ود تسوى هذي الدنيا ومافيــــــــها
ــــــــــــــــــــــــــــــــــــــــــــــــــ ـــــــــــــــــــــــــــــــــــــ


كلمات حسن باحارثه (ديوان النقش بالــــــــدان)1992م